Adolygiad: Parti foam Maes B
 gan Sioned Gwen Davies
Yn Eisteddfod Genedlaethol Dinbych y llynedd cafodd Maes B flas ar barti foam sydd fel arfer i'w weld ar Ynys wyllt Ibiza.
Gan fod y parti foam wedi bod mor llwyddiannus y llynedd cynhaliwyd un eto eleni a fi gafodd y pleser o fod yng nghanol y foam drwy'r nos.
Tra roedd y foam yn llifo roedd tri DJ poblogaidd yn diddannu'r dorf gyda'u cerddoriaeth ddawns.
Y cyntaf i chwarae oedd Ian Cottrell sydd i'w weld fel arfer ar raglenni S4C fel 4 Trac a Bandit.
Yn Ninbych y llynedd roedd yn chwarae ar y nos Wener yn gig olaf Diffiniad ond eleni roedd ar ben ei hun gan chwarae cerddoriaeth dda iawn ac yn micsio yn llwyddiannus - ond nid oedd yn cael llawer o gefnogaeth gan y dorf.
Dwi'n amau mai'r prif reswm am hynny oedd mai ef oedd y cyntaf i chwarae ac nad oedd y foam wedi dod tan yn hwyrach yn y noson ac efallai nad oedd digon o alcohol yn llifo ar ddechrau'r noson!
Ond ar y cyfan perfformiad da iawn.
 Mynd yn wyllt
Erbyn tua unarddeg o'r gloch dechreuodd y foam lifo o'r nenfwd a phawb yn mynd yn wyllt wrth ddawnsio yn y foam gan wlychu lot!
Dj Dafis oedd yr ail i chwarae ac erbyn hyn roedd pawb yn barod i ddawnsio a mwynhau'r gerddoriaeth ddawns.
Rhoddodd Dj Dafis berfformiad gwych gan droelli llawer o gerddoriaeth ei hun gydag ambell gân boblogaidd o'r sin ddawns Saesneg oedd yn ychwanegu at fwynhad y dorf.
Prif Dj y noson oedd yr enwog Jean Jaques Smoothie sydd yn dod o Gymru ac wedi cael llwyddiant mawr yn siartiau gyda'i gân 2 People.
Cafodd Jean Jaques Smoothie groeso mawr gan y dorf ond ar ôl hynny ni chymerodd y dorf lawer o sylw o'r gerddoriaeth gan fod pawb yn cael cymaint o hwyl yng nghanol y foam.
Ar y llaw arall roedd pawb yn dawnsio gyda digon o egni i gerddoriaeth Jean Jaques Smoothie hyd oriau mân y bore.
Roedd y parti foam yn llwyddiant mawr eto eleni, ac yn noson llawn hwyl gyda cerddoriaeth o'r safon uchaf gyda Dj's yn troelli yn ardderchog.
Bechod wir nad oedd llawer mwy o bobl yno yng nghanol y foam ac yn cefnogi Ian Cottrell, Dj Dafis a Jean Jaques Smoothie.
Efallai y flwyddyn nesaf y dylai Maes B feddwl am gynnal y parti foam yn hwyrach yn ystod yr wythnos gan fod llawer o bobl yn cyrraedd Maes B yn ystod y tri diwrnod olaf.
Ond cofiwch, os ydych chi'n mynd i unrhyw barti foam, mewn eisteddfod neu yn Ibiza, peidiwch a gwisgo eich dillad gorau a drutaf, oherwydd rydych yn gwlychu o'ch corun i'ch sowdl.
|
