±«Óãtv

Spanglish
Mewn dwy iaith



Y sêr
Adam Sandler, Paz Vega, Téa Leoni, Cloris Leachman, Shelbie Bruce.

Cyfarwyddwr
James L Brooks

Sgrifennu
James L Brooks

Hyd
131 munud

Sut ffilm
Er yn cael ei chyflwyno fel comedi; ffilm ysgafn a theimladwy yw hi mewn gwirionedd a'i byrdwn ar fod yn driw i chi eich hun a'ch tras.

Y stori
Mae Flor (Paz Vega) yn dianc dros y ffin o Fecsico i fyw yn yr Unol Daleithiau gyda'i merch fach eithriadol o dlws, Cristina (Shelbie Bruce). Yno, mae'n cael ei chyflogi'n forwyn yng nghartref John a Deborah Clasky (Adam Sandler a Téa Leoni) , eu merch Berice (Sarah Steele) a mam Deborah (Cloris Leachman).

Er i Cristina ddysgu Saesneg dim ond Sbaeneg sydd gan ei mam ac mae hynny'n destun rhywfaint o ddoniolwch a rhwystredigaeth rhyngddi hi a'i chyflogwyr gyda'r ferch fach yn gorfod cyfieithu'r sgyrsiau rhyngddynt.

Ond mae arwyddocâd dyfnach i'r 'broblem iaith' hon.

Yn wraig rwystredig a siomedig o Bernice, ei merch dew ei hun, mae Deb yn closio gymaint at y Sbaenes fach hynod o dlws y mae'n ei phrysur feddiannu fel pe byddai yn ferch iddi ei hun.

Y canlyniad ydi tyndra a gwrthdaro rhwng pawb - yn enwedig rhwng Deb a Flor sydd am fagu ei merch yn driw i'w gwreiddiau Sbaenaidd ac hefyd rhwng Bernice a'i mam.

Yn y canol yn cymodi y mae mam feddw, Deb, sydd wedi cymryd at Flor oherwydd ei bod "yr unig un sydd ddim yn feirniadol ohona fi".

Adroddir y stori gan Cristina o draethawd amdani ei hun sy'n rhan o gais mynediad i brifysgol Princeton.

Y darnau gorau
Mae nifer o olygfeydd da:
Gan na ddefnyddir isdeitlau gall y golygfeydd Saesneg-Sbaeneg fod yn hwyl - er i rai beirniaid gwyno am hyn.
Mae ffrae trwy gyfrwng cyfieithydd yn gweithio'n dda iawn.

Deborah a John yn caru.

Perfformiadau
Gan nad yw'r cyfarwyddwr yn siŵr ai comedi ynteu drama ddifrifol yw hon mae'r perfformiadau yn amrywio o actor i actor o ran dehongliad.

O bosib mai Sandler, fel y gŵr sy'n cael ei ddal yn y canol, sy'n dygymod orau.

Ond wedi dweud hynny, mae perfformiad Leoni yn hynod afaelgar yn 'dwyn' Cristina er mwyn ei 'hachub' - mewn rhyw ffordd Eliza Doolittle-aidd - trwy ei boddi mewn gwerthoedd a deisyfiadau Americanaidd y mae Flor yn reddfol am amddiffyn ei merch rhagddynt.

Unochrog a simplistaidd braidd yw cymeriad Flor. Diolch byth, felly, fod Vega yn actores ddigon medrus i argyhoeddi ac i ennyn ein cydymdeimlad tuag at fam sy'n gweld ei phlentyn yn cael ei meddiannu a'i mowldio'n Americanes.

Gystal â'r trelar?
Heb weld un.

Y canlyniad
Gyda'r thema o 'berthyn' ac o werthoedd ac o amrywiaeth ddiwylliannol mae apêl arbennig yma i Gymry. Hefyd, mae'n haws i ni werthfawrogi arwyddocâd y sefyllfa ieithyddol.

Gwendid y ffilm yw ei bod yn llawer, llawer, iawn rhy hir. Gellid o leiaf fod wedi tocio rhai golygfeydd yn sylweddol os nad hepgor ambell un yn llwyr a thrwy hynny wneud y ffilm yn uniad llawer tynnach a mwy effeithiol.

Ar wahân i hynny mae yma blethiad cwbl dderbyniol o hiwmor, dwyster, dychan a drama gyda digon o deimladrwydd i wlychu'r llygaid..

Geiriau cofiadwy
Mae'r gwrthdaro rhwng dau ddiwylliant yn cael ei grynhoi pan yw Cristina yn cael ei hystyried ar gyfer ysgoloriaeth ysgol Americanaidd aruchel:
"Un ai fe fydd hi'n od yno neu fe fydd yn rhaid iddi droi ei hun i fod fel hwythau," meddai Bernice.

Meddai Cristina am ei hunaniaeth: "Mae pwy ydw i yn dibynnu'n llwyr ar un peth - yr wyf yn ferch fy mam."

Meddai ei mam am Deborah: "Y tro hwn, synnwyr cyffredin ydi dy farn isel ohono ti dy hun."

Pan wêl Deborah Cristina gyntaf: "Drychwch ar y plentyn yna - gallai wneud ffortiwn yn cario babis i eraill."

Meddai'r fam am ei meddwdod: "Fe roddais i'r gorau i yfed rai wythnosau yn ôl ond wnaeth neb sylwi - sy'n golygu fy mod i'n ymddwyn yn eithaf pan oeddwn i'n feddw , mae'n rhaid."

Ambell i farn
Ni fu neb yn gor ganmol gyda gwefan Saesneg y ±«Óãtv yn cyhuddo'r cyfarwyddwr o fod mewn tir neb rhwng comedi a drama ac heb wybod i ba gyfeiriad i fynd.

Cwynodd mwy nag un - yn annheg, siŵr o fod - at ddiffyg isdeitlau.

Haws deall y cyhuddiad fod Leoni yn goractio ond nid pawb fyddai'n cytuno â hynny ychwaith.

Mae unfrydedd barn ynglŷn â pherfformiad clodiw Cloris Leachman fel y fam yng nghyfraith feddw-ond-doeth fodd bynnag.

Cytunir hefyd y gellid fod wedi gosod mwy o her i Vega trwy ddatblygu cymeriad hynod unochrog Flor.

Gwerth mynd i'w gweld?
Heb os.

Ychwanegwch eich sylwadau i'r dudalen fan hyn: Enw a lleoliad: Sylw: Mae'r ±«Óãtv yn cadw'r hawl i ddewis a golygu sylwadau. Darllenwch sut i wneud y siwr caiff eich sylwadau eu cyhoeddi. I anfon cyfraniad mwy, cysylltwch â ni.