±«Óãtv

• Enw:

Lloyd Jones


• Beth yw eich gwaith?

Sgriblwr.


• Pa waith arall ydych chi wedi bod yn ei wneud?

Gwas fferm, newyddiadurwr, gweithio efo'r methedig, darlithydd, gweithio mewn Chamber of Horrors.


• O ble'r ydych chi'n dod?

Bryn Clochydd, Gwytherin ger Llanrwst, ar odre Mynydd Hiraethog.


• Lle'r ydych chi'n byw yn awr?

Ger y môr yn Llanfairfechan. Mae'r môr yn bwysig i mi.


• Wnaethoch chi fwynhau eich addysg?

Dydw i ddim yn cofio'r addysg ond rwy'n cofio'r paffio.


• Beth wnaeth i chi sgrifennu eich llyfr diweddaraf - dywedwch ychydig amdano?

Wedi sgwennu tri llyfr yn Saesneg, rhoddwyd digon o hyder i mi - gan Y Lolfa - i sgwennu llyfr yn y Gymraeg. Rwy'n falch iawn fy mod i wedi gwneud hynny. Llyfr ydyw am ofnau'r oes hon ynghylch y dyfodol, ac mae'n stori serch hefyd.


• Pa lyfrau eraill ydych chi wedi eu sgrifennu?

Mr Vogel, Mr Cassini, a My First Colouring Book.


• Pa un oedd eich hoff lyfr pan yn blentyn?

The Swiss Family Robinson, mae'n debyg.


• A fyddwch yn edrych arno'n awr?

Na fyddaf!


• Pwy yw eich hoff awdur?

Dafydd ap Gwilym yw'r meistr.


• A oes unrhyw lyfr wedi gwneud argraff arbennig neu ddylanwadu arnoch?

Oes, nifer fawr, pob un wedi newid fy myd ychydig.


• Pwy yw eich hoff fardd?

Rwy'n hoffi barddoniaeth fodern, yn arbennig y to ifanc o ferched dawnus sydd wedi dod i'r fei.


• Pa un yw eich hoff gerdd?

Dim ffefryn.


• Pa un yw eich hoff linell o farddoniaeth?

Unrhyw un gan yr hen Ddafydd 'na eto.


• Pa un yw eich hoff ffilm a rhaglen deledu?

Rwy'n tueddu i wylio rhaglenni yn ymwneud â hanes a chelf ar y bocs; rwy'n hoffi ffilmiau o bedwar ban y byd, heblaw am rwtsh Hollywood.


• Pwy yw eich hoff gymeriad a'ch cas gymeriad mewn llenyddiaeth?

Fedra i ddim neilltuo neb.


• Pa ddywediad, dihareb, adnod neu gwpled sydd agosaf at y gwir?

Yng ngenau'r sach mae cynilo.


• Pa un yw eich hoff air?

Rwy'n licio geiriau ormod o lawer i ddewis un.


• Pa ddawn hoffech chi ei chael?

Arlunio.


• Pa dri gair sy'n eich disgrifio chi orau?

Dyn bach rhyfedd.


• A oes rhywbeth yr ydych yn ei ddrwglecio amdanoch eich hunan?

Ha!


• Pa berson byw neu hanesyddol ydych chi'n ei edmygu fwyaf a pham?

Fy nheulu.


• Pa ddigwyddiad hanesyddol fyddech chi'n hoffi bod yn rhan ohono?

Y diwrnod diwethaf o ryfel yn y byd.


• Pa berson hanesyddol hoffech chi ei gyfarfod a beth fyddech chi yn ei ddweud neu ei ofyn?

Buaswn i'n licio stwnsian efo fy mherthnasau dros y canrifoedd.


• Pa un yw eich hoff daith a pham?

Unrhyw le yng Nghymru - rwyf wedi cerdded reit o amgylch Cymru ac ar draws y wlad wyth gwaith.


• Beth yw eich hoff bryd bwyd?

Bwyd 'di bwyd i mi. Mae o'n obsesiwn efo pobol.


• Beth yw eich hoff weithgareddau amser hamdden?

Nap yn y pnawn.


• Pa un yw eich hoff liw?

Glas (hen liw arferwyd ei weld yn yr awyr).


• Pa liw yw eich byd?

Eh?


• Pe gallech gyflwyno deddf newydd beth fyddai hi?

Na, gewch chi basio'r deddfau.


• A oes gennych chi lyfr arall ar y gweill?

Nagoes. (Diolch i Dduw medd pawb).


• Beth fyddai'r frawddeg agoriadol ddelfrydol i nofel neu waith arall?

Daeth yr amser i dawelu...

Mehefin 2009