Un o'r chwaraewyr mwyaf enwog yn y gêm, mae'r asgellwr yma o Manchester United a Chymru wedi ennill bron bob cwpan neu fedal sydd ar gael i'w glwb, adref a thramor.
Wedi ei eni yng Nghaerdydd ar Dachwedd 29, 1973, symudodd Giggs a'i deulu i Fanceinion pan oedd o'n saith, ond gyda rhieni o Gymru ac yn ffyrnig o ffyddlon i'w wlad enedigol, doedd chwarae dros Loegr ddim yn ddewis iddo.
Pêl-droed oedd yn mynd â bryd Giggs ac yn 9 oed fe'i gwelwyd gan un o sgowtiaid Manchester City ac ar ôl hynny bu'n chwarae'n gyson mewn cystadlaethau lleol. Fe ymddangosai ar y cychwyn cyntaf mai i City y byddai Giggs yn chwarae ond yn 14 oed fe arwyddodd i dîm ieuenctid United.
Ar ôl blynyddoedd o hyfforddi fe wnaeth ei ddebut cyntaf yn 1991 ac mae'n aelod gwerthfawr iawn o dîm llwyddiannus Alex Ferguson.
Enillodd Giggs wobr Brydeinig Personoliaeth Chwaraeon y Flwyddyn y ±«Óãtv ar gyfer 2009. Ef hefyd wnaeth gipio Personoliaeth Chwaraeon y Flwyddyn ±«Óãtv Cymru'r un flwyddyn.
Roedd 2009 yn flwyddyn gofiadwy i'r chwaraewr canol cae Manchester United a chyn gapten Cymru gan iddo ennill Uwchgynghrair Lloegr am yr unfed tro ar ddeg. Does yr un chwaraewr arall wedi ennill prif gynghrair Lloegr mwy o weithiau na Giggs, oedd wedi ymddeol o bêl-droed rhyngwladol yn 2007.
Yn 2011 bu'n rhan o stori ymfflamychol iawn am ei fywyd preifat yn y wasg a ledodd i'r Senedd ac a lenwodd y papurau dyddiol am wythnosau.
Hanes y bêl hirgron o'i gwreiddiau hyd at y Gamp Lawn
