 |
|
Ar
drywydd llofrudd
Awdur yn hudo darllenydd ar drywydd ffug
Dydd Iau, Ionawr 2, 2003
|
•
Tewach na Dwr gan Dylan Jones. Addasiad Rhiain Dafydd. Gwasg
Gomer £6.95
Adolygiad gan Catrin Jones
Nofel lofruddiaeth ag iddi dro annisgwyl yn ei chynffon yw Tewach
Na Dwr. Hi oedd nofel y mis yn Nhachwedd.
Dylan Jones, llawfeddyg o Landeilo yw’r awdur a does dim rhyfedd felly
mai meddyg yw prif gymeriad y nofel.
Meddyg yn dychwelyd i Gymru i ail afael yn ei waith wedi marwolaeth
ei wraig yw Sam. Wedi iddo dreulio cyfnod yn Awstralia gyda’i chwaer
mae’n barod i ail afael yn ei fywyd, ymgartrefu yn ei hen gartref
a gwneud ei orau i anghofio llofruddiaeth erchyll ei wraig, Jo.
Atgof poenus
Ond nid yw hynny’n dasg hawdd yn arbennig gan fod Debbie, gefaill
Jo, yn atgof poenus o’r gorffennol.
Ond yn fwy na hynny mae rhywun â’i gyllell yn Sam ac am wneud yn siwr
na fydd yn anghofio am farwolaeth ei wraig gan wneud ei fywyd yn uffern.
Ond mae Sam yn benderfynol o ddarganfod pwy yw llofrudd creulon ei
wraig a phwy sy’n ei wylio yntau.
Sawl pennod gyffrous
Nofel ddirgelwch yw hon felly ac mae yma sawl pennod gyffrous wrth
i ni geisio darganfod pwy yw’r llofrudd gyda Sam.
Mae’n nofel hawdd i’w darllen ac mae popeth yn symud yn gyflym. Mae’n
rhaid i mi ddweud na theimlais i fod y llyfr yn araf na diflas ar
unrhyw adeg ac roedd yma ddigon yn digwydd i gynnal diddordeb y darllenydd.
Mewn rhai nofelau mae’n hawdd rhagweld erbyn y diwedd pwy yw’r llofrudd
ond nid nofel felly ydyTewach na Dwr.
Roeddwn i bron yn sicr erbyn i mi gyrraedd y penodau olaf fy mod i
wedi datrys y dirgelwch ac yn gwybod pwy laddodd Jo.
Ond yn union wedi i mi sicrhau fy hun mai’r cymeriad hwnnw oedd yn
gyfrifol cafodd fy namcaniaeth ei chwalu’n llwyr wrth i’r awdur fynd
â mi ar drywydd cwbwl wahanol.
Cynllunio gofalus
Mae’r nofel wedi ei chynllunio’n ofalus ac rydym ni’r darllenwyr yn
cael ein tynnu i bob cyfeiriad gan yr awdur.
Mae’n nofel seicolegol a dim ond wrth blymio i feddyliau dyrys y cymeriadau
yr ydym ni’n dod i ddeall digwyddiadau’r nofel hon mewn gwirionedd.
Dyma gymeriadau lliwgar.
Mae Sam y prif gymeriad yn llwyddo i ennyn ein cydymdeimlad yn syth
wrth iddo wneud ei orau i ail afael yn ei fywyd.
Mae’r cymeriadau eraill yn rhai annwyl a dymunol hefyd – Debbie gefaill
Jo a’i gwr Paul sy’n gwneud eu gorau i warchod Sam; Chloe hen ffrind
i Jo wedyn sy’n llwyddo i ennill calon Sam a chyfeillion Sam yn y
feddygfa ar wahân i Ned Weelan, meddyg digon surbwch a blin.
Hefyd mae’n rhaid cofio am Phipps, cymeriad gwallgof sydd yn glaf
mewn ysbyty meddwl ac wedi bod yn dyst i lofruddiaeth Jo ond wedi
anghofio pwy yw’r llofrudd.
Pwy felly fyddai wedi gallu cyflawni llofruddiaeth o’r fath? A fyddai
un o’r cymeriadau hyn yn ddigon dieflig i gyflawni’r weithred erchyll?
Wna i ddim datgelu hynny, mi fydd rhaid i chi fynd ati i ddarllen
y nofel.
Braidd yn anghredadwy
Ond er fy mod i’n mwynhau’r ffaith fod yr awdur yn ein tywys ar sawl
trywydd gwahanol wrth chwilio am y llofrudd gan greu nofel hynod o
gyffrous, mae’n rhaid i mi ddweud mai siomedig oeddwn i wedi darllen
y tudalennau olaf.
Erbyn hynny roeddwn i’n teimlo fod y digwyddiadau braidd yn anghredadwy
yn arbennig o ystyried digwyddiadau blaenorol y nofel ac yn teimlo
nad oedd rhai pethau’n taro deuddeg.
Ond efallai mai bod yn orfeirniadol ydw i yma ac efallai mod i wedi
ymddiried gormod yn rhai o’r cymeriadau wrth ddarllen ac wedi cael
gormod o sioc yn y tudalennau olaf.
Yn sicr fe lwyddodd yr awdur i daflu llwch i’m llygaid.
Ydi mae hon yn nofel gwerth ei darllen os ydych chi’n hoff o nofelau
dirgelwch a llofruddiaeth ac efallai y cewch i well hwyl na fi ar
ddyfalu pwy yw’r llofrudd.
Ebostiwch eich sylwadau
chi am lyfrau
|
|
|
Gair
am air
Siart
Cymru
Llyfrau
ar y We
Nôl
i'r archif
