±«Óãtv

Dyma stori sydyn arall sy'n meddu ar yr un ystwythder plot a chymeriadau cryf â gweddill y storïau sydyn tebyg.

Stori dywyll, yn llawn troeon annisgwyl yw Dŵr Dwfn am Teg yn byw yng nghysgod ei wraig brydferth a'i frawd hŷn.

Rhaid iddo droi at ei frawd am help pan ddaw Dewi Treharne i chwarae rhan annisgwyl yn ei fywyd. All y brawd mawr ei helpu i ddianc rhag ei drafferthion cas?

Yn y meddwl

Stori feddyliol yw hon yn adrodd hanes brwydr fewnol Teg a chawn holl ofnau, pryderon a datgeliadau'r cyfrinachau tywyllaf sy'n gwmwl dros fywyd Teg.

Nid oes llawer yn digwydd ac mae hanner y llyfr yn ymwneud â gorffennol diweddar Teg a'r hanner arall yn y presennol.

Mae tro bendigedig yn y gynffon pan ddaw'r darllenydd ar draws bradwr arall. Ond sut gallodd Teg gelu ei gasineb chwerw tuag at un sydd mor agos ato?

Apeliodd clawr Dŵr Dwfn ataf gan imi adnabod traeth fy nhref enedigol, Aberystwyth, ac mae yna hefyd sawl cyfeiriad at y dref ar ddechrau'r nofel a hynny'n gwneud imi fwynhau'r llyfryn yn fwy.

Mae'r iaith yn bwrpasol syml a phlaen i gyd-fynd â moelni amlwg y plot. Mae ambell i reg yn yn creu tensiynau annioddefol ar adegau.

Mae'n addas i ferched ac i fechgyn ond nid wyf yn siŵr iawn i ba oedran oherwydd er ei bod yn hawdd ei deall mae rhai geiriau cryfion a golygfeydd treisgar. Y pris yw £2.99 ac er nad yw'n rhy ddrud mae storïau sydyn eraill i'w cael am £1.99.